على المغرور طبعي بقوتي اتكبر

امد روحي بتواضع جسر للطيبين
وعلى المغرور طبعي بقوتي اتكبر

اذا صاعد جبل باوع بعين الناس
تره اليصعد جبل من يرتفع يزغر

انه المنحر اذا عديت روحك سيف
لسان السيف طبعه يقبل المنحـــر

حللها اعله كيفك واعترف بعدين
من ابتدي الجلسه وافتح المحضر

مو شاعر ولكن عنتره من اغتاض
من قلمي القصايد تنتفض عسكـــر

حالف ابد باب الشعر ماعــديه
بس جرني غرورك والقلم قرر

يعلمك موقعك شنهو انته بالاعراب
حرف زايد ولالك موقــعً يـــُذكر

اجرنـك وانصبك واعتقد غاليت
مارفعك هوايه عليك حـرف الجر

لاتنــدحج بيه وقلمي ثق تنين
من يـنــفــخ قـصايد نـــار تطشر

اذا بعت اعله غيري لاتبيع وياي
يتيم اعله البواجي اتعلمه يتحسر؟

من اكللك ولك سمعاً وطاعه تكوم
اذا تسمعني اجيت هنـاك تتكتر

غشيم تصورتني بطيبي ريشة طير
كل عقلك بنفخة ريح تطيّر؟

ولك شايل خلك من كبر سور الصين
كد سنين عمرك واخذ هالمصــدر