ياللي على وجهي قريتي كل صفحات الشقى // للشاعر ضيدان بن قضعان

ياللي على وجهي قريتـي كـل صفحـات الشقـى
اقري و انا بـ اكتب قصيدة واشعل الساحـه حريـق

باقي كثر ما راح واللي راح نصـف اللـي بقـى
وان ما وصلت لـ غايتي بـ اموت في نصف الطريق

يابنت يوم امطر غلاك بـ قلـب ضيـدان و سقـى
تدرين وش سبّـة شقاه و سبّـة الجـرح العميـق ؟؟

شقاه من يمناه و اسم الشيـخ والنفـس امحقـى
والجرح منّك ياأعذب العذبات يالمـوت الرقيـق

يا بنت ما دام البدو تخلف هقـاوي مـن هقـى
وانا بدوي منّي يشيل من الزمـن مـا لا يطيـق

ابفتخر حنّا بـدو نعشـق علـى وضـح النقـا
حنّا بـدو فينـا الولـد لـ القمـه العليـا عشيـق

حنّا بدو فينا الولد لو شـاف موتـه مـا اتّقـى
حنّا بدو فينا الولـد يرقـا ولـو مالـه رفيـق

حنّا بـدو فينـا الولـد لا مـن رقـا رقـا رقـا
الين يوصل غايته لـو كـان فـي قمـة طويـق

يابنت جيتك والثمـن عمـري ابـي ليلـة لقـا
يمّا كذا والا بـلاش مـن الصداقـة والصديـق

وساعة تبسّمتي وشفت الجمر والثلـج اصدقـا
قلت أشهد أن الموت حق وصحت لك صيحة غريق

واعتقت دمعي والزعل والحزن لرضـاك أعتقـا
وأغفت عيوني في عيونك يا عساها مـا تفيـق

وامنت باللي سخـّرك تقريـن صفحـات الشقـا
واشعلت بردي في دفاك وشبّت الساحة حريـق