قصيده روعه للشاعر العراقي احمد الذهبي

رهمتك علي بس ما رهمت وياي
أنت ألما ردت شتريد اسويلك
عاشرتك نجم من جان عمرك ليل
أذوب واشتعل حتى أبقى اضو يلك
ومن طلعت شمس خط رجعه ما خليت
وما جازيتني لمن خلص ليلك
بانيلك جنت حضرة عشك بالروح
ومرقد للمحنه بروحي بانيلك
ردت منك مراد وخذت مني مراد
وعلك بجفوفي شايلهن زناجيلك
انذرلك جنت وأفتر واحني الباب
هسه تهدمت ياباب احنيلك
أمانه أسرار عمري وبيها مااوصيك
يم شباج ذنبك صاحن دخيلك
وبيكفك بعد صون الامانه تخون
مااكدر بعد اغفر وعديلك
مابينك وبينك حيرتني وياك
مره ابجي على طبعك ومره اغنيلك
بدلالك جن طفل بالجرح مال كبار
وشد الجرح بيد وبيد الوليلك
لاتنصف عدل لاترضى بالمقسوم
تاخذ حصتك ومن حصتي اوديلك
أنت الوزعت والفرح سهمك صار
من سهم الحزن شتريد اخليلك
جبتها وياك شعره وعاقل ومجنون
كل ساعة وتجرها وأنا ارخيلك
شلي بهالتعب والعمر وشلة كاس
من كاس العمر جم دوب ابدي لك
راح اصبر بدونك وارهم بلياك
واذبح رمش عيني الجان يبجيلك
وأتحمل عذابك والبعد والشوك
وما حط صورتك كدامي وشكليك
وما أكلك نسيتك بس جرح بالروح
يكسر واهسي وما يقبل امشيلك
عين الشالتك كلتلها اشيلج راح
كالت شيلني وما قبلت أتشيلك
وجرحي ألفاك صدره وما يريد خياط
واكف جنه واحد جاي يدعي لك
بس مجبور أدفنك ياعشك ياشوك
واقره ألفاتحه والوحشة اصلي لك
بعيوني الحزن يقرونه ليواسون
وألفوك الحزن لو تدري شحجيلك
شماتي الاجو واسوني ثالث يوم
حيل وياك كالو مدري شد حيلك
وكالو مو حلو ثوب الطويل عليك
واليكصر بعد شتضن يكفيلك



الشاعر احمد الذهبي